အမှိုက်

          အမှိုက်၏ အဓိပ္ပါယ်ကို ဖွင့်ဆိုရမည်ဆိုပါလျှင် မရှိသင့်၊ မရောက်သင့်သည့် နေရာတွင် ဖြစ်နေ၊ ရှိနေသည့်အရာဟု ဆိုရမည်ဖြစ်သည်။

          တချို့တွေကတော့ အသုံးမဝင်တော့သည့်အရာ၊ အသုံးပြု၍ မရတော့သည့်အရာကို အမှိုက်ဟု သတ်မှတ်ကြသည်။ တကယ်တမ်းတွင် အသုံးပြု၍ မရတော့သည့်တိုင် အမှိုက်ဟု သတ်မှတ်မရသည့် ပစ္စည်းတွေကလည်း ရှိသည်။ ပမာဆိုရလျှင် ရှေးဟောင်းပစ္စည်းများ ဖြစ်သည်။ ပြတိုက်အတွင်းရှိ အနားပဲ့နေသည့် ရေတကောင်းအိုးလေးမှသည် ကားများ၊ လေယာဉ်ပျံများအထိ အသုံးပြု၍ မရတော့သည့်တိုင် အမှိုက်ဟု သတ်မှတ်ရန် ဝေးစွ တန်ဖိုးကြီးနေဆဲ၊ အဖိုးဖြတ်မရဘဲ ရှိနေကြသည့် ပစ္စည်းများဖြစ်သည်။ အသုံးပြု၍ မရတော့သော်လည်း အသုံးဝင်နေသောကြောင့် ဖြစ်သည်။ သမိုင်းတန်ဖိုးကြောင့် အသုံးဝင်နေသည့် ပစ္စည်းပေါင်းများစွာ ကမ္ဘာပေါ်တွင် ရှိနေသည်။ ကျွန်တော်တို့ နိုင်ငံတွင်လည်း များစွာရှိသည်။

          တစ်ချိန်က အသုံးဝင်ခဲ့၊ အသုံးကျခဲ့သည့်အတွက် ယနေ့အသုံးပြု၍ မရတော့သည့် အရာတို့ကို အမှိုက်ဟု သတ်မှတ်ရန် ခက်ခဲလာလျှင် မေးခွန်းတစ်ခု ကျယ်လောင်စွာ ထွက်ပေါ်လာနိုင်ပါသည်။

          " အမှိုက်ဆိုတာ ဘာလဲ … "

          အဘယ့်ကြောင့်ဆိုသော် အရာဝတ္ထုတိုင်းသည် အတိတ်တစ်ချိန်ချိန်တွင် အသုံးဝင်ခဲ့၊ အသုံးချခဲ့၊ အသုံးကျခဲ့သောကြောင့် ဖြစ်သည်။ မည်သို့ပင်ဆိုစေ အမှိုက်ကတော့ ရှိနေသည်။ ထို့ကြောင့် အမှိုက်ဟူသော ဝေါဟာရ တွင်ကျယ်လာခြင်း ဖြစ်သည်။

          အမှိုက်ကို သရုပ်ခွဲရမည်ဆိုလျှင် ရုပ်(ရုပ်ဝတ္ထု)အမှိုက်နှင့် စိတ်အမှိုက်ဟူ၍ ခွဲခြားနိုင်သည်။ ရုပ်အမှိုက်ကိုပင် ထပ်မံ၍ စိတ်ဖြာကြည့်ပါက သက်ရှိနှင့် သက်မဲ့ဟူ၍ ထပ်ထွက်လာမည်ဖြစ်သည်။

          သက်မဲ့အမှိုက်ကတော့ ရှင်းသည်။ အသုံးပြုပြီးသွား၍ အသုံးပြုရန် မလိုတော့သည့် ပစ္စည်းများဖြစ်သည်။ ပြန်အသုံးပြု၍ ရသော်လည်း ကရိကထများသည်၊ ရှုပ်သည်ထင်၍ စွန့်ပစ်လိုက်သည့် ပစ္စည်းများဖြစ်သည်။ အသုံးပြုနေသော်လည်း အမှိုက်ဖြစ်သွားသည့် ရုပ်ဝတ္ထုပစ္စည်းများလည်း ရှိသည်။ ဥပမာပေးရမည်ဆိုလျှင် အိမ်သာထဲသို့ရောက်နေသည့် ပန်းအိုး၊ အလုပ်စားပွဲပေါ်မှာ ရှိနေသည့် စားသောက်ပြီးသွားသည့် ပန်းကန်၊ ကော်ဖီ စသည်တို့ဖြစ်သည်။ ဆိုလိုသည်မှာ မရှိသင့်သည့်နေရာတွင် ရောက်နေသောကြောင့် အသုံးပြုနေသော်လည်း အမှိုက်ဖြစ်သွားခြင်း ဖြစ်သည်။

          သက်ရှိအမှိုက်ဆိုသည်မှာ လူ၊ ခွေး၊ ကြောင်မှ အစပြု၍ မလုပ်သင့်သည်များကို လုပ်နေ၊ မရှိသင့်သည့်နေရာများတွင် ရောက်နေသည့် သတ္တဝါများကို ဆိုလိုခြင်းဖြစ်သည်။ ဥပမာ- ရုံးချိန်အတွင်း မိမိဌာနရှိ လုပ်ရမည့်အလုပ်များကို မလုပ်ဘဲ တခြားဌာနသို့သွားကာ စကားပြောနေခြင်း၊ တခြားဌာနမှ အလုပ်ကို ဝင်ရောက်စွက်ဖက် လုပ်ကိုင်နေခြင်းဖြစ်သည်။ တချို့လက်ဖက်ရည်ဆိုင် ရောက်နေသည်။ ဘီယာဆိုင်ရောက်နေသည်။ ထိုသူများအားလုံးသည် အမှိုက်ဖြစ်သည်။ မရှိသင့် မရောက်သင့်သည့် နေရာများသို့ အလုပ်ချိန်အတွင်း ရောက်နေသောကြောင့် ဖြစ်သည်။

          သီတဂူဆရာတော်ဘုရားကြီးက ကိုယ့်နေရာကိုယ်နေဆိုသော တရားတစ်ပုဒ်ကို ဟောခဲ့ဖူးပါသည်။ မည်မျှပင် ရာထူးကြီး တာဝန်ကြီးပါစေ၊ မည်မျှပင် အသုံးဝင် အသုံးကျသည့် ပုဂ္ဂိုလ်ဖြစ်ပါစေ ကိုယ်နေရမည့် နေရာတွင် မနေဘဲ၊ ကိုယ်လုပ်ရမည့်အလုပ်ကို မလုပ်ဘဲ ရှိနေပါက သက်ရှိအမှိုက်ပင်ဖြစ်သည်။

          စိတ်အမှိုက်ဆိုသည်က မကြံစည်အပ်၊ မတွေးတောအပ်သည်ကို ကြံစည်တွေးတော နေခြင်း ဖြစ်သည်။ ဖြစ်ပြီးခဲ့သည့် အချည်းနှီးမဲ့သော အဖြစ်အပျက်တို့ကို ပြန်လည်တွေးတောနေခြင်း၊ ပြန်လည် ခံစားနေခြင်း ဖြစ်သည်။ မိမိ၏ အတိတ်တွင် အောင်မြင်ခဲ့၊ ရှုံးနိမ့်ခဲ့သည်တို့ကို ပြန်တွေးတောနေခြင်းဖြင့် စိတ်အမှိုက်တို့ တင်နေခြင်းဖြစ်သည်။ တစ်ပါးသူ၏ အတိတ်တွင် မှားယွင်းခဲ့၊ လွဲချော်ခဲ့သည်များကို ပြန်တွေးပြန်ခံစားရင်း ကိုယ့်စိတ်ထဲမှာပင် အမှိုက်ပုံသည်။ တချို့တွေကတော့ ဖြစ်မလာသေးသည့် အနာဂတ်ကို ကြံစည်တွေးတော စိတ်ကူးယဉ်ရင်း လက်တွေ့ဘဝတွင် ဘာတစ်ခုမျှ မလုပ်ဆောင်ဘဲ စိတ်အမှိုက်တင်နေသူများ ဖြစ်သည်။

          အမှိုက်ကစ ပြာသာဒ်မီးလောင်ဆိုသော စကားပုံကဲ့သို့ စိတ်အမှိုက်ကြောင့် နိဗ္ဗာန်တစ်ဖက်ကမ်း ဝေးခဲ့ရသည့် ပုံဝတ္ထုတို့ကို ဘာသာရေးစာအုပ်များတွင်လည်းကောင်း၊ ရဟန်းသံဃာ၊ ဆရာတော်များ ဟောကြားသည့် တရားတော်များတွင်လည်းကောင်း ကြားနာခဲ့ရဖူးပါသည်။ ဒေဝဒတ်သည် ဈာန်ရနေသည့် ရဟန်းဖြစ်သည့်တိုင် ဘုရားရှင်ကို မနာလိုဝန်တိုသည့် စိတ်အမှိုက်ကြောင့် မပြုသင့်၊ မလုပ်သင့်သည်တို့ကို ပြုလုပ်ကာ နိဗ္ဗာန်တစ်ဖက်ကမ်းနှင့် ဝေးခဲ့ရခြင်း ဖြစ်သည်။ ရုပ်ဝတ္ထုတွင် စွဲလောင်သည့်မီးကို တစ်ပါးသူက ကူညီကာ ငြိမ်းသတ်ပေးနိုင်သော်လည်း မိမိ၏ စိတ်သဏ္ဍာန်တွင် စွဲလောင်သည့်မီးကိုမူ မိမိကိုယ်တိုင်ပင် ငြိမ်းသတ်မှ ငြိမ်းအေးနိုင်ပေလိမ့်မည်။

          လူတစ်ဦးတစ်ယောက်၏ စိတ်အမှိုက်မီးကို တခြားသူတို့ ဝိုင်းဝန်းမငြိမ်းသတ်နိုင်သော်လည်း ထိုစိတ်အမှိုက်မီးသည် တခြားသူတို့၏ စိတ်နှလုံးကိုတော့ ကူးစက်လောင်ကျွမ်းစေနိုင်ပါသည်။ ထို့ကြောင့်ပင် တိုင်းပြည်တိုးတက်အောင် ဆောင်ရွက်နေသည့် ကနောင်မင်းသားကြီး လုပ်ကြံခံခဲ့ရခြင်း ဖြစ်သည်။ တိုင်းပြည်လွတ်လပ်ရေးအတွက် ဆောင်ရွက်နေကြသည့် ဗိုလ်ချုပ်တို့ လုပ်ကြံခံခဲ့ရခြင်း ဖြစ်သည်။ စိတ်အမှိုက်ပုံကြီးနေသူတို့ကြောင့် တိုင်းပြည်သည် တိုးတက်မှု ဆုတ်ယုတ်ကာ အောက်ကျ နောက်ကျ ဖြစ်နေရသည်။ ယခုအခါတွင် ဝန်းကျင်ကို သတိထားကြည့်မည်ဆိုက တခြားသူ၏ အပြစ်များကို လက်ညှိုးထိုးနေကြသည့် စိတ်အမှိုက်ကြီးနေသူတို့ကိုလည်း တွေ့မြင်နေကြရသည်။

          ရုပ်ဝတ္ထု အမှိုက်ရှင်းရသည်က စိတ်အမှိုက်ရှင်းရသည်ထက် ပိုလွယ်ပါသည်။ ပြောင်းလဲကြရအောင် ဆိုသော ကြေးကြော်သံဖြင့် အမှိုက်တွေ ကောက်ခဲ့ကြသည်။ အမှိုက်တွေ ရှင်းခဲ့ရသည်။ လူထုအားနှင့်မို့ အမှိုက်တွေ ရှင်းသွားသည်။ လမ်းကြိုလမ်းကြားတွေ သန့်သွားသည်။ သို့သော် စိတ်အမှိုက်ကို မရှင်းနိုင်ခဲ့ကြသောကြောင့် မကြာမီမှာပင် အမှိုက်တို့ တောင်ပုံရာပုံ ဖြစ်ခဲ့ရပြန်ပါသည်။ ကျွန်တော်တို့ ဦးစားပေး ရှင်းကြရမည်မှာ စိတ်အမှိုက်များလားဟာ မကြာခဏ စဉ်းစားမိသည်။

          ခေတ်ပြောင်းချင်လျှင် စနစ်ကို ပြင်ဖို့လိုပါသည်။ စနစ်ကို ပြင်ဖို့ရန်အတွက် စိတ်ပြောင်း (အတွေးပြောင်း)နိုင်ဖို့လိုသည်။ စိတ်စင်ဖို့ လိုပါသည်။ စိတ်တွင် အမှိုက်တို့ ကင်းစင်နေဖို့ မိမိစိတ်အမှိုက်ကို မိမိကိုယ်တိုင် စွန့်ပစ်နိုင်မှဖြစ်မည် ဖြစ်သည်။

          အမှိုက်၏ အဓိပ္ပါယ်ကို မရှိသင့်၊ မရောက်သင့်သည့်နေရာကို ရောက်နေသည့်အရာဟု ဖွင့်ဆိုထားသော်လည်း ရှိသင့်၊ ရှိထိုက်သည်ဟု သတ်မှတ်ထားသည့်နေရာတွင် ရှိနေသည့် အမှိုက်တို့ကလည်း များလွန်းလှပါသည်။ မြင်သာထင်သာရှိသဖြင့် ထိုအမှိုက်တို့ကို လူထုအားဖြင့် ရှင်းရပါမည်။

          မမြင်သာ၊ မထင်သာရှိနေသည့် မိမိတို့၏ စိတ်တွင်းအမှိုက်တိုကို တစ်ဦးချင်းစီတိုင်းက ရှင်းထုတ် နိုင်မည်ဆိုလျှင် မီးခိုးယမ်းငွေ့တို့ ပါးလျလာမည်မှာ သေချာပါသည်။ စိတ်တွင်းအမှိုက်တို့ ကင်းစင်သွားသည့်တစ်နေ့၊ တစ်ဦးလက်ကို တစ်ဦးဆွဲခေါ်နိုင်သည့် တစ်နေ့တွင် ပူလောင်အက်ကွဲနေသည့် ငြိမ်းချမ်းရေးဆိုသော အသံတို့ တိတ်ဆိတ်သွားပါလိမ့်မည်။

          ငြိမ်းချမ်းရေးဆိုသည်က မငြိမ်းချမ်း၍ အော်မြည်နေကြသည့် အသံ မဟုတ်ပါလား။

          မိမိတို့ စိတ်နှလုံးအတွင်းရှိ မုန်းတီးမှု၊ အာဃာတ စိတ်အညစ်အကြေး အမှိုက်တို့ကို ရှင်းထုတ် နိုင်သည့်တစ်နေ့တွင်  ခေတ်မီဖွံ့ဖြိုးတိုးတက်သည့် ဒီမိုကရေစီ နိုင်ငံတော်ကြီးအဖြစ် တည်ဆောင်နိုင်မည်မှာ အသေအချာပင် ဖြစ်တော့သည်။

 

 လေးစားစွာဖြင့်

 ထူးအောင်ဝင့်                                                                        

(အတွေးအမြင်၊ အမှတ်(၃၁၆)၊ ဒီဇင်ဘာ ၂၀၁၈၊ စာမျက်နှာ(၁၆၉))

Views: 212

Reply to This

Featured Discussions

© 2019   Created by Myanmar Network.   Powered by

Badges  |  Report an Issue  |  Terms of Service