ပုဂ္ဂလိက ပညာရေး အတိုင်းအတာတစ်ခုထိ အခွင့်အလမ်း ရှိလာတော့ ဆရာဆရာမ လုပ်လိုသူတွေလည်း အရင်ကထက် ပိုလာပါတယ်။

ပညာရေးမှာ မှန်မှန်ကန်ကန် အသက်မွေးဝမ်းကြောင်းသူတို့အတွက်လည်း "တပည့်မရှား တစ်ပြားမရှိ" ဆိုရမယ့်ခေတ် မဟုတ်တော့ပါ၊ ဈေးကွက်က ခွင့်ပြုသော ထိုက်သင့်တဲ့ ရပိုင်ခွင့် ရှိလာပါပြီ … သို့သော် ဆရာအလုပ်ဆိုတာ (ကိုယ်ပိုင်လုပ်ငန်းအနေနဲ့ အောင်မြင်သောသူတို့မှအပ) သူဌေးဖြစ်နိုင်သော အလုပ်တစ်ခု မဟုတ်ဆိုတာကိုလည်း သတိချပ်သင့်ပါတယ်။

မကြာခဏ မေးလေ့ရှိတတ်တာက (အထူးသဖြင့် နိုင်ငံတကာသင်ရိုးနဲ့သင်သော international schoolတွေမှာ) ဆရာလုပ်လိုပါတယ်။ ဘာတွေ လိုအပ်သလဲ ဆိုတဲ့ မေးခွန်းပါ။

ဒါတွေ မရှိမဖြစ် လိုပါတယ်။

----------------------------------------------------------

၁။ ကလေးချစ်စိတ်၊ သည်းညည်းခံလိုစိတ်

မူကြိုကလေးတွေကနေစ အထက်တန်းဆင့်ထိ ကျောင်းသား အရွယ် အသီးသီးအလိုက် ကြုံရမယ့် သည်းညည်း ခံနိုင်ပြီဆိုတာ သေချာရဲ့လား။

ပတ်သက်ဆက်နွယ်သူတွေကို အလုပ်အတွက် စီစဉ်ပေးဖူးတာ မျက်နှာပျက်ခဲ့ရဖူးပေါင်း မနည်းပါ။ အထူးသဖြင့် မူကြိုမှာ အလုပ်လုပ်ကြည့်တော့မှ စိတ်ထဲထင်သလို တစ်နေကုန် air-con ခန်းထဲမှာ အင်္ဂလိပ်လိုပြောပြီး လှတပတနဲ့ ကြော့ကြော့လေး နေရတာမဟုတ်ဘဲ လိုအပ်တဲ့အခါ မတစ်ထောင်သား ကလေးတွေ အညစ်အကြေးကစ သင်ကြားပြသ သုတ်သင်ပေးရမှန်းသိတော့ ဆက် မလုပ်လိုပါ ဆိုသူတွေ ကြုံခဲ့ရဖူးပါပြီ။ အရွယ်အလိုက်အတွက် စာသင်ဖို့ရာ သွန်သင်ဆုံးမလမ်းညွှန်ဖို့ရာ အမှန်တကယ် ဝါသနာ ပါတာ ဟုတ်ရဲ့လား သေချာ ဆန်းစစ်စေလိုပါတယ်။ လုပ်ငန်းခွင်မှာ မပျော်နိုင်လောက်ရင် အစကတည်းက မစ တာ အကောင်းဆုံးပါ။ ပညာရေးလောကသားတို့အတွက် ဆရာစိတ် ရှိဖို့ရာသည် ပထမ ပဓာန ပါ။

----------------------------------------------------------

၂။ အင်္ဂလိပ်ဘာသာစကား

International School ဆိုတာ နိုင်ငံခြားသား ဆရာတွေ (နိုင်ငံခြားသား ကျောင်းသားတွေ လည်း ရှိတတ်ပါတယ်) အပါအဝင် အင်္ဂလိပ်လို ပြောဆိုနေရသော လုပ်ငန်းခွင် ပါ။ ကျောင်းသားများက ငယ်စဉ်ကတည်းက အင်္ဂလိပ်ဘာသာစကား ပြောရင်း ကြီးခဲ့ကြသူတွေ။ ဒီလို လုပ်ငန်းခွင်မှာ အလုပ်လုပ်ဖို့ သင့်လျော်သော ဘာသာစကားစွမ်းရည် ရှိပြီးမှ အဆင်ပြေပါမယ်။

အနိမ့်ဆုံးအဆင့် Common European Framework of Reference for Languages (CEFR) B1/ B2 Level … IELTS Band 6 အထက် ရှိမှ … Upper Intermediate Level ရှိမှ လုပ်ငန်းခွင်လည်ပတ်ရုံ အဆင့် ရှိပါမယ်။ ကျွမ်းကျင်လေ ပိုကောင်းလေ ပါ။

အလုပ်လုပ်လိုပါတယ် ဆိုတဲ့ မိတ်ဆွေတွေ၊ မိတ်ဆွေတို့ရဲ့ ဆွေမျိုးသားချင်းတွေ၊ မိတ်ဆွေတို့ရဲ့ မိတ်ဆွေတွေကို ကျောင်းတွေဘက်က လက်ခံပေးလို့ မရတာ၊ အလုပ်အခန့်မခံရတာ ဒီအချက်ကလည်း အရေးပါတဲ့ အချက်တစ်ခုပါ။

အမှန်တကယ် လုပ်လိုတယ် ဆိုရင် အချိန်ယူ ပြင်ဆင်ထားရမယ့် အရာတစ်ခုပါ။ မရှိမဖြစ် အရေးကြီးလှသော အဓိက လိုအပ်ချက် ပါ။

----------------------------------------------------------

၃။ ဆရာဖြစ်လေ့ကျင့်သင်ယူမှု

ကျွန်တော်တို့နိုင်ငံမှာ ပညာရေးတက္ကသိုလ်ဆင်း ဆရာအတတ်သင် သင်တန်းဆင်းမှသာ အစိုးရကျောင်းတွေမှာ လုပ်လို့ရပြီး မကြာသေးခင်က အထိတော့ ပြင်ပ ပုဂ္ဂလိက ကျောင်းတွေအတွက် ပြင်ပ ပုဂ္ဂလိက ဆရာဖြစ်လေ့ကျင့်ရေး ဆိုတာမျိုးတွေ မရှိသလောက်ပါ။ အနည်းအကျဉ်း ရှိတာတွေကို တရားဝင် အသိအမှတ်ပြုမှုလည်း မရှိသေး ယူဆပါတယ်။ ခုနောက်ပိုင်း ကာလတွေမှာတော့ British Council … American Centre အစရှိသည်တို့ကနေ ဆရာဖြစ်သင်တန်းများ ပို့ချပေးနေသလို ပြင်ပသင်တန်းများကနေ သင်ယူလို့ရတာတွေလည်း ရှိလာနေပါပြီ။ online ကနေ တက်လို့ရတာတွေလည်း ရှိပါတယ်။ သက်ဆိုင်ရာ ကျောင်းတွေအလိုက် သင်တန်းများ စီစဉ်ပေးတာတွေလည်း ရှိပါတယ်။ NGO များက ဖွင့်သော သင်တန်းများလည်း ရှိပါတယ်။ ပညာရေး စိတ်ပညာ သီအိုရီများ၊ လက်တွေ့ အသုံးချပုံများ၊ ဘာသာရပ်တစ်ခုချင်းစီအတွက် သင်ကြားနည်းများ၊ ကလေးသူငယ် ပြုစုစောက်ရှောက်ပညာပေးခြင်းဆိုင်ရာ သင်တန်းများ၊ သင်ခန်းစာ ပြင်ဆင်နည်း သင်ကြားနည်း စစ်မေးနည်း (ပြင် သင် စစ်)၊ ပညာရေးသင်ရိုးညွှန်းတမ်းဆိုင်ရာလေ့လာမှု … စသည် စသည်တို့ကို မဖြစ်မနေ လေ့လာလေ့ကျင့်ပြင်ဆင်ထားဖို့ လိုပါတယ်။ မည်သည့် သင်တန်းမှ မတက်ဖူးသေးဘဲ လက်ရှိ စာသင်နေသော လုပ်ငန်းခွင်တွင်း ဆရာဆရာများလည်း ထပ်မံ ဖြည့်ဆည်းထားဖို့ လိုနေဆဲပါ။ ခုချက်ချင်းလက်ငင်း မလိုသေးပါ ဆိုရင်လည်း မကြာခင် လိုလာမှာ ဖြစ်တော့ ဒီနေ့စလုပ်ထားရင် တစ်ရက် စော ပြီးပါမယ်။ မကြာမီအချိန် ပုဂ္ဂလိကပညာရေး ဥပဒေ အသက်ဝင်လာမယ့်အချိန် ကျမှ တစ်ပွဲတိုး စ လုပ်ဖို့ရာ ခက်ပါလိမ့်မယ်။

Cambridge International Assessment Education နဲ့ Cambridge English တို့ကနေ online …. Face to face လေ့လာသင်ယူလို့ ရတာတွေ မနည်းလှပါ။ အမှန်တကယ် ပြင်ဆင်လိုသူများ ဆက်သွယ်ပါ။ အတတ်နိုင်ဆုံး အကြံပြုပေးပါမယ်။ ငွေကြေးကုန်ကျမှု သောင်းဂဏန်းကစ သိန်း ရာချီထိ အကုန်အကျခံပြီး တက်ရောက်ပြင်ဆင်စရာ level အမျိုးမျိုး ရှိပါတယ်။ rate of return on investment အနေနဲ့ ရေရှည်မှာ အကျိုး ရှိ ကို ရှိပါလိမ့်မယ်။

----------------------------------------------------------

၎။ ဘာသာစကားနဲ့ ဘာသာရပ် ပေါင်းစပ်လေ့ကျင့်သင်ကြားခြင်း အတတ်ပညာ Content and Language Integrated Learning (CLIL)

အပေါ်က အပိုင်းရဲ့ အဆက်လို့လည်း ဆိုနိုင်ပါတယ်။ မြန်မာနိုင်ငံသား ဆရာဆရာများအတွက် international school တွေမှာ အင်္ဂလိပ်ဘာသာစကားသင် ဆရာ အဖြစ်ထက် သိပ္ပံ၊ သင်္ချာ၊ လူမှုရေးဘာသာရပ်တွေမှာ သင်ကြားပေးသူတွေ ဖြစ်လာစရာ ရာခိုင်နှုန်း ပို များတယ် ဆိုရမှာပါ။ ဒီဘာသာရပ်တွေကို အင်္ဂလိပ်လို ပြော သင်ရာမှာ ဘယ်ပုံဘယ်နည်း သင်ရမလဲ ဆိုတာက အရေးပါလှပါတယ်။ သုံးရမယ့် ဘာသာရပ်သုံး အင်္ဂလိပ်ကို နေ့စဉ်သုံးအင်္ဂလိပ် ပဲ အဓိက နားလည်မယ့် ကျောင်းသားများအတွက် ဘယ်လိုဘယ်ပုံ သင်ရမလဲ ဆိုတဲ့ အင်မတန် စိတ်ဝင်စားဖွယ် သင်ကြားနည်းပညာအကြောင်း သီအိုရီ နဲ့ လက်တွေ့ နှစ်ခုလုံး လေ့လာပြင်ဆင်ထားသင့်ပါတယ်။

ကိုယ် သင်ပြရမယ့် သက်ဆိုင်ရာ ဘာသာရပ် ကျွမ်းကျင်ပိုင်နိုင်အောင် ပြင်ဆင်ဖို့ရာ ကတော့ အထူးပြောစရာ မလိုမယ့် ကိစ္စရပ် ပေါ့လေ။

CLIL အတွက် Cambrige English online course ကနေ သင်ယူလေ့လာနိုင်သလို (certificate ရသည်အထိ $26 ပဲ ကုန်ကျပါတယ်) British Council က စစ်မေးတဲ့ TKT CLIL ကိုလည်း ဖြေဆို လက်မှတ်ယူနိုင်ပါတယ် ($ 50 ဝန်းကျင် ကုန်ကျပါတယ်)။

----------------------------------------------------------

၅။ နည်းပညာ

စက်မှုခေတ်ပြောင်းတော်လှန်ရေး တစ်ခေတ်ပြီး တစ်ခေတ် ဖြစ်ခဲ့တာ ခုချိန်မှာ စတုတ္ထမြောက် ရောက်သွားပြီ ... Industry 4.0 လုပ်ငန်းခွင်အတွက် ကျောင်းသားတွေကို လေ့ကျင့်ပေးရာမှာ ဆရာလုပ်သူ ကိုယ်တိုင်က နည်းပညာအသုံးချ သင်ကြားပေးဖို့ မရှိမဖြစ် လိုပါပြီ။ လွန်ခဲ့တဲ့ ဆယ်စုနှစ်တွေကတည်းက သုံးနေတဲ့ PowerPoint တွေလောက်က မလုံလောက်တော့ပါဘူး (အနိမ့်ဆုံးအဆင့်တော့ ဒါကို တတ်ကို တတ်ရပါမယ်)။ Google Classroom တွေ၊ အခြား Web 2.0 tool တွေ သုံးပြီး သင်ကြားကြရမယ့် အချိန် ရောက်လာနေပါပြီ။

ဥပမာအားဖြင့် ဆိုရရင် Google ကနေပြီးတော့ ဆရာဆရာမများအတွက် google for education course တွေ အခမဲ့ ဖွင့်ပေးထားပါတယ်။ လေ့လာပြီးလို့ ကျွမ်းကျင်ပိုင်နိုင်ကြောင်း သက်သေပြစရာ လက်မှတ် အရယူလိုတယ် ဆိုရင်လည်း စာမေးပွဲကြေးက $10 လောက်သာ ပါ။ သာမန် သင်ကြားရေးဆရာဖြစ်ကနေ Trainer အဆင့်ထိ level အမျိုးမျိုးကို ဈေးနှုန်းသက်သက်သာသာနဲ့ ရယူထားနိုင်ပါတယ်။

အရည်အချင်း ပြည့်မီသော ဆရာ ဆရာမ ဖြစ်လာစေဖို့၊ နိုင်ငံတကာတန်းဝင် ဖြစ်လာစေဖို့ ဆိုရင် ကိုယ့်အားကိုယ်ကိုး ကိုယ့်ဟာကိုယ် ဝါယမ စိုက် ရုန်း ပြီး ပြင်ဆင်ဖို့ရာ ဆရာဆရာမတွေ ဆရာဆရာမ လောင်းလျာတွေရဲ့ တာဝန်ပါပဲလေ။

ပုခက်တွင်းက သင်္ချိုင်းထိ ပညာရှာဖို့ ဆိုတာ ဆရာဆရာမတွေအတွက် အထူးလိုအပ်ချက်ပဲ မဟုတ်ပါလား။

Views: 236

Reply to This

Replies to This Discussion

ပြည့်သလောက်တော့ ရှိသွားပါပြီး

RSS

Featured Discussions

© 2019   Created by Myanmar Network.   Powered by

Badges  |  Report an Issue  |  Terms of Service